Fjordstien stengte mandag 12. mai
I samband med oppstart av arbeidet med pumpestasjon på Åse, må vi dessverre stenge fjordstien ved Åse reinseanlegg i nokre periodar. I første omgang gjeld dette i innleiande fase der byggegropa skal gravast ut. Då vert det behov for sprenging og anleggsarbeid tett opp til fjordstien.
Stenginga startar mandag 12. mai og vil vare i fire til fem veker. Dersom vi blir ferdige med arbeidet før, så opnar fjordstien også før. Vi vil også vurdere undervegs om det er mogleg for arbeidet sin del å halde stien open for eksempel når det er helg.
Det vil også kome arbeid seinare i byggefasen som gjer at vi vil måtte stenge stien i kortare periodar. Mot slutten av etableringa må vi krysse fjordstien med grøft og rør som skal ut i sjøen.
Pumpestasjonen:
Pumpestasjonen skal avløpsvatn vidare i sjøleidning over Åsefjorden og til Kongshaugen reinseanlegg. Når pumpestasjonen kjem på plass, skal vi avvikle drifta av Åse reinseanlegg og avslutte utslepp av avløpsvatn med lav reinsegrad.
Pumpestasjonen blir som eit toetasjes bygg på til saman 370m2. Det skal ligge på austsida av reinseanlegget. Det er valt ein byggeskikk som står i stil med husa og nausta i området. I tillegg til bygging av pumpestasjon ligg det også i planane at det skal leggast til rette og stellast i stand rundt pumpestasjonen, for å bevare kvalitetane i området ved fjordstien.
Arbeidstid
Byggearbeida skal pågå i ordinær arbeidstid og støyande aktivitetar er avgrensa til tidsromet mellom klokka 9 og 15.
Bygging av sjølve stasjonen startar etter sommaren og skal halde fram til ut på våren 2026. Deretter kjem ein periode der ein monterer pumper og teknikk inne i huset. Pumpestasjonen skal etter planen vere klar til drift i desember 2026
Pumpestasjonen blir etablert på kommunal grunn og arbeidet skal ikkje vere til hinder for trafikken på Borgundfjordvegen.
Byggjerda er komne på plass langs Borgundfjordstien ved Åse reinseanlegg.Spørsmål?
Har du spørsmål eller treng å kome i kontakt med byggeleiar, kan du ringe 98623034
Vedtatt plan
Etter høyringsrunde var endeleg plan opp i kommunestyret 6. juni 2024 og vart vedteken. Sakspapira finn du her.
Vedtaket vart klaga til Statsforvaltaren som behandla saka og stadfesta vedtaket til Ålesund kommunestyre. Vedtaket til Statsforvalteren les du her. (PDF, 301 kB) Reguleringsplanen for pumpestasjon på Åse er dermed godkjent.
Planområdet er markert med raudt i kartet.