Leidninga er ein del av overføringsnettet til Kongshaugen reinseanlegg, som skal reinse avløpsvatnet frå om lag 50.000 innbyggarar i Ålesund og Sula. Rundt 28 kilometer av leidninga blir lagt i sjø, mellom anna for å spare naboar og trafikk for ulemper ved graving, medan vel fem kilometer må gå over land. Strekket frå Breivika til Borgundfjordvegen er det lengste landstrekket. 

Frå Breivika og oppover mot Moa

Det er allereie lagt leidning frå sjøen i Breivika og oppover mot Moa. Arbeidet er ferdigstilt fram til Spjelkavik kyrkje. Her skal det byggast ventilhus ved parkeringsplassen. 

I tillegg er arbeidet med riving av tidlegare Spjelkavik smie nedanfor Borgundfjordvegen på området ved Ålesund Silostasjon ferdig. Også her skal det byggast ventilhus. 

Boring under Borgundfjordvegen

Frå Nedre Furmyrhatlen til Spjelkavik smie skal det borast ein «mini-tunnel» for leidninga under Borgundfjordvegen slik ein slepp å grave av vegen og stoppe trafikken i lengre tid. Det vil likevel måtte bli noko graving i vegen, men berre i ein meir avgrensa periode.

Frå Nedre Furmyrhatlen skal leidninga leggast vidare over golfbana og i alleen mellom Amfi Moa og Circle K. Arbeidet på golfbana startar ut på hausten slik det blir graving og arbeid utanom høgsesongen for golfaktivitet. 

Når vi skal krysse E136 og andre vegar med mykje trafikk, vert det lagt vinn på å planlegge slik at det kan gjerast raskast mogleg og eventuelt med hjelp av nattarbeid slik at det blir minst mogleg ulempe for trafikken.