Frank Hide, Håkon Teigen, Jan Erik Hanken, Thea Aasen, verksemdsleiar Ålesund vatn og avløp, Arve Olav Bang, Pål Sand, Marius Sand og Trygve Wigestrand Årsvold.

Ein ny milepæl er passert når det første spadetaket for overføringsanlegget til Kongshaugstranda reinseanlegg vart tatt tirsdag 25. februar.

Oppstart på arbeidet vart gjort i Breivika i Ålesund kommune og det var verksemdsleiar for Vatn og avløp, Arve Olav Bang, som tok det symbolske spadetaket.

Det har tidlegare vorte lagt nokre hundre meter med rør i Moa-området i samband med Bypakke-prosjekt, men no startar ein for alvor opp med arbeid med overføringsnett til Kongshaugstranda, pumpestasjonar og ventilhus. 

Det er allereie teke ned skog på tomta og det er venta at gravearbeidet startar denne veka. 

Pumpestasjon Breivika

Oppstarten skjedde i samband med oppstart av bygging av pumpestasjonen i Breivika. Det skjer på same tomta som der reinseanlegget i Breivika ligg. 

Pumpestasjonen i Breivika får to etasjar på til saman 270 kvadratmeter. Stasjonen vil huse pumper og tilhøyrande teknikk for å ta imot avløpsvatn frå Larsgården og pumpe dette vidare på leidningsnettet. Det er vald ein byggeskikk på bygget som vil passe inn med dei andre bygga i området.

Etableringa av sjølve stasjonen vil etter planen pågå frå slutten av februar 2025 til februar 2026. Deretter blir det montasje av teknikk i bygget samt ferdigstilling utomhus fram mot sommaren 2026. Pumpestasjonen skal vere ferdigstilt, testa og klar til prøvedrift i desember 26, men tek ikkje i mot avløpsvatn før i 2028. Entreprenøren jobbar innanfor normal arbeidstid, og støyande aktivitet er avgrensa til mellom klokka 09:00 og 15:00.

Frå pumpestasjonen i Breivika skal leidninga gå i grøft oppover mot Moa. Ved parkeringsplassen ved Spjelkavik kyrkje skal det byggast ventilhus. Dette blir i tegl og med materialbruk som er tilpassa kyrkja. 

34 kilometer med rør

Til saman skal overføringsanlegget ha 25 ulike objekt og det skal leggast om lag 34 kilometer med rør. Det meste av overføringsleidningane skal leggast i sjø. Det er billegast og mest gunstig for klimaet. 

På land skal mesteparten leggast på offentleg grunn på offentleg grunn medan det nokre plassar vil gå over landbruksareal og privat grunn. Det vert også tatt omsyn til friluftsområde, verneverdig natur, fornminne og så bortetter. Det same gjeld i sjø der ein må ta omsyn til kulturminne og naturvernområde, fiskeri, båttrafikk, vêr-, bølgje- og straumforhold, botnforhold og installasjonar. 

Meir om overføringsanlegget finn du her.

Det nye reinseanlegget på Kongshaugstranda og overføringsnettet skal vere i drift i 2028. Då kan ein legge ned elleve reinseanlegg som er utdaterte og som ikkje innfrir krava til reinsing av avløpsvatn.