Når bygging av reinseanlegg på Kongshaugstranda no går over i ein ny fase med ny entreprenør og med arbeid i fjellet der det skal skytast ut tunellar og berghallar, er det oppretta varslingsteneste gjennom ordninga på www.nabovarsling.no.

Dersom du vil ha varsling om sprenging, går du inn på denne nettsida og legg igjen telefonnummeret ditt. Då får du ein sms i forkant av kvar sprenging sprenging. Det er enkelt både å melde seg på og melde seg av tenesta.
Alle som vil ha varsling må legge inn telefonnummeret

Det er mange som i den første fasen med vegarbeid langs Kongshaugstranda melde frå om at dei ville ha varsling. Desse må dessverre legge inn telefonnummera sine på nytt i den nye ordninga. 

Tenesta som blir tilbode no via nabovarsling.no gir både varsling og utvida informasjon om sprengingsarbeidet, der dei mellom anna viser kor mange salvar som er skotne og kor langt arbeidet har kome. Dette er ei teneste som er brukt mange stader i Norge og som enkelte lokalt også kjenner til via varsel i samband med Lerstadtunnelen og arbeidet på strekninga Blindheim-Flisnes. 

Stenging av veg

I starten av arbeidet og før ein kjem seg innover i fjellet, så vil vegen bli stengt i samband med sprenging. Det blir vakter som stoppar trafikken i 5-10 minutt medan salva går av og ein får forsikra seg om at det er trygt å passere. 

Arbeidstid

For sprengingsarbeidet vil det mest vanlege vere mellom to og fire salvar per dag. Arbeidet startar klokka sju og skal vere ferdig klokka 19.30. I oddetalsveker er det arbeidstid laurdag 7-18. I partalsveker vert arbeidet avslutta fredag kl 18. Dette er arbeidstider slik det er planlagt. Men, når ein jobbar med sprengstoff og fjell, kan det skje at ein av sikkerheitsmessige årsaker, må gjere ferdig ein jobb og ein dermed av og til må gå utover desse tidene.