Pumpestasjonen på Åse.

For å vere klar til prøvedrift og oppstart, må vi køyre mange delar av prosjektet samtidig. Framdrifta er god og går som forventa.

Nederst i saka ser du bilde frå ei heil rekke av stadene vi har aktivitet.

• Larsgården –  grunnarbeid ferdig og klart for den delen av pumpestasjonen som skal vere over bakken.  
• Breivika – så godt som ferdig. Pumper og utstyr er installert i pumpestasjonen og finpussen utomhus er stort sett unnagjort.  
• Leidninga over Moa – ferdig ved golfbana, også med «bonus-prosjektet», den nye gangvegen frå golf-området og nedover mot Furmyrhatlen. E136 er kryssa og siste strekk oppover mot ventilhuset ved Spjelkavik kyrkje står for tur.
• Ventilhus ved Spjelkavik kyrkje –  har begynt å reise seg ut av byggegropa.
• Ventilhuset ved Åsefjorden – her har vi feira tett bygg.
• Åse – Den nye pumpestasjonen har fått tett bygg og kranselaget er unnagjort.
  Vegsund – Stafsethneset. Pilot-strengen har gjennombora strekninga frå Vegsund til Stafsethneset. No er den store borekrona på veg tilbake frå Stafsethneset til Vegsund.
• Stafsethneset – rett over ferien startar arbeidet med ventilkummen. Når området her er ferdig, blir berre kumloket synleg.  

Sula kommune

• Djupvika –  pumpestasjonen har fått ferdig støypt nederste del. Dekke og andre etasje ventar over ferien.
• Langevåg sentrum, Stadsnesvegen – straks ferdig med legging av rør. Vi kryssar fingrar for at vi er i mål og kan opne vegen for trafikk før entreprenøren tek ferie om eit par veker.  
• Pumpestasjon Langevåg. Vi har fått sett i gang arbeidet og Molvær barnehage har fått på plass sikringsgjerde med «kik-hol» så dei får følge med på arbeidet.  
• Kippervika-Vågevatnet-Orkevika. Straumen er kryssa og første biten av sjøleidninga som skal gjennom vatnet er på plass. Arkeologiske utgravingar på strekket mot Orkevika startar i sommar.
• Reinseanlegget på Kongshaugstranda – vi har kryssa vegen med røra som skal ut i sjø. Inne i berghallane veks dei fram dei store betongkonstruksjonane og reinsebassenga.