Området der pipa skal kome opp og utsikta nordover mot Vegsundsida.

For å få fram maskinar, utstyr og folk til arbeidet, blir det køyring i terrenget fram til der pipa skal vere. Det blir brukt same trase som tidlegare har vore brukt til køyring fram til pipe-punktet. For at ikkje myra skal bli punktert, blir det nokre plassar nødvendig å forsterke grunnen med mellom anna masse. I traseen kan det også bli behov for rydding av kratt. I tillegg vil traktorvegen som skal brukast på nokre stader bli oppgrusa og utvida.

Etter at arbeidet er ferdig, blir terrenget tilbakeført og sett i stand.
I Breidalen skal det støypast eit betongfundament der pipa skal kome opp. Deretter blir det bora eit pilothol ovanfrå. Vidare blir det jobba med endelege pipeløpet slik at det bora fjellet endar opp nede i berghallen og blir køyrt vekk derifrå.

Avsperra anleggsområde

Anleggsområdet blir avsperra og vi oppmodar folk, for si eiga sikkerheits skuld, om å respektere dette og halde seg utanfor sperringane.

Arbeidet med boringa skal etter planen pågå ut året. Montasje av pipe og luftinntak og tilstelling av terrenget er planlagt til våren/sommaren neste år. 

Skisse som viser traseen der det skal transporterast folk, maskinar og utstyr fram til anleggsområdet.