Kongshaugen reinseanlegg med overføringsanlegg er eit samarbeidsprosjekt mellom Ålesund kommune og Sula kommune. Anlegget skal reinse avløpsvatn frå rundt 50.000 personar/66.000 pe.

For å lage overføringsnettet har vi tidlegare jobba oss opp frå Breivika og til parkeringsplassen ved Spjelkavik kyrkje der vi no er i gang med å bygge ventilhus. Frå andre sidan har vi lagt rør frå Borgundfjorden og opp via golfbana til parkeringsplassen ved Moa helsehus.

No skal det leggast rør på det siste strekket som står igjen. 

Dette arbeidet vert gjort i etappar slik at vi gjer oss ferdige på eit område før vi går vidare til det neste.

Vi startar frå sør med første strekket frå rundkøyringa på E-136 og opp til Moa Helsehus. 

Stengt for bilar

Neste strekk er langs Vestmoa forbi Moa Helsehus og til krysset til Breivikvegen. Her må vi stenge vegen for bilar medan vi arbeider, medan det blir lagt til rette for at du kan gå forbi der vi arbeider. I tillegg til å legge rør på dette strekket skal også Vatn og avløp i Ålesund kommune legge nye leidningar i Breivikvegen. Då får vi meir samordna arbeid og mindre tid med graving og ulemper for naboar og trafikk enn om vi skulle gjort dette i to omgangar.

Vidare tek vi eit nytt strekk frå krysset Vestmoa/Breivikvegen og til krysset ved gravplassen. Også her blir det stengt for trafikk, men ope for gåande. 

Siste strekk og arbeidsområde er langs gravplassen og til parkeringsplassen ved Spjelkavik kyrkje. Her samarbeider vi med Tafjord fjernvarme som også skal legge rør når vi likevel må grave og stenge for trafikk. Her blir det jobba - og dermed stengt - frå midten av oktober og utover til midten av november.

Det er planlagt at vi skal vere ferdige med heile strekninga frå rundkøyring på E136 og fram til parkeringsplassen ved Spjelkavik kyrkja før jul.  

Omkøyring blir skilta.. 

Arbeidstid

Entreprenøren jobbar i utgangspunktet frå klokka 7 til 17 på kvardagar. I spesielle tilfelle kan arbeidstida bli utvida og dei har i utgangspunktet løyve til støyande arbeid mellom klokka 7 og 19 alle dagar utanom søndag. Ikkje-støyande arbeid kan vare til klokka 21.